Hmar mipui popovin ei na ei sitna, vawisuna Peace Rally le inzawma LPS Vision news report (25 Aug. 2011) ka thei ang angin ka hung ziek dawk hi hei post chawt ka tih.
Mizoram sawrkar le HPC(D) hai inbie nawk hai sien ti an ditzie inlangtirna’n Sinlung Hills huom sunga All Party huoihawtna hnuoiah Lam Hrawna (Peace Rally) nei a nih. Rally hi Sinlung Hills huom sung, hmun thum (3), Sakawrdai, Suongpuilawn le Saiphai haia nei a nih. Rally neina hmun pui tak, Sakawrdaiah a kawl vela khuo 17 a inthawk mipui 1200 vel fe khawmin mipui 3000 velin lam hrawna an nei. Suongpuilawn khuoah a kawvela khuo panga (5) haia inthawk mipui 1200 velin lam an hraw a. Saiphai khuoah a kawl vel khuo ruk (6) a inthawk mipui fe khawmin mi 2000 velin lam hrawna hi an nei bawk. Lampui hraw mipui le hotuhaiin an dit tak chu Mizoram sawrkar le HPC(D) hai hin inremna dawkan awt tlang raw hai seh ti hi a nih.
HPC President Pu Thangliensung chun hieng hin a hril:
“HPC le Mizoram sawrkar hai chun um 1994 khan inbiekremna an lo neiin HPC chun a silai hai a intung ta a. Kum 1997 khan Sinlung Hills Development hi Mizoram sawrkarin a lo indin ta bawka. Kum 17 liem ta a, kha inremna dungzui khan Sixth Schedule hnuoia kan chanvo chang ve ding kan ni a. Chuonglaizing chun, interim period sawt tak a ni el ta khelah, hi inremna hi a hlawtlingna kan hmu nawh. Mizoram sawrkarin a thaw ding a thaw naw leiin Hmar People Convention (Democratic) khawm hi a hung pieng ta a, hieng ang hun hi ei tlung an tah. Mizoram sawrkarin ramhnuoia inthawkin ami thuoi suok ringawta, inremna le muongna tak tak a um thei naw a nih. Hmar mipuihai ngaisak an ni naw leiin helpawl dang dang hieng HPC, HRF, MAIDA le HPC(D) hai an lo pieng suok ta a. Sinlung Hills Development Council hi a ni dan ding ang taka a function hi ei constitutional right a ni a, ei birth right khawm a ni bawk a nih. HPC(D) le Mizoram sawrkar hai hi inbiekna dawkan awt tlang dingin Mizoram sawrkar hi ei ngen takzet a nih.”
Mipui fe khawmhai hin resolution siemin kum 17 liemtah, July 27, 1994 a Memorandum of Settlement an siem kha a la puitling naw zing hi pawi an ti hle thu an puonga. Mizoram sawrkarin hi Memorandum of Settlement hi a sukpuitling naw leiin HPC(D) hin ralthuom hmangin an hel mek a ni a. Inremna tluontling le muongna a um theina dingin Mizoram sawrkarin HPC(D) hi inbiek pui ngei raw seh ti’n an ngen. Mizoramin inremna le muongna kum 25 lai a lo nei ta lai zingin, Sinlung Hills huom sunga mipui hai chun thlabar le ralmuong lovin a la um zinga. Hi kawnga hin mipuihai thangpuia hma la nghal dingin an ngen bawk.